O‘zbekiston Savdo-sanoat palatasi raisi o‘rinbosari Nodira Shotursunova va Birlashgan Arab Amirliklarining Sharja amirligida joylashgan “Skyline University College” universiteti vakili Rakesh Guar o‘rtasida hamkorlik masalalari bo‘yicha navbatdagi muzokaralar o‘tkazildi.

Uchrashuv davomida nodavlat oliy taʼlim muassasalarida kadrlar malakasini oshirish, mutaxassislar almashinuvi, axborot texnologiyalarini rivojlantirish, tadbirkorlikka oid taʼlim dasturlarini takomillashtirish kabi yo‘nalishlarda hamkorlik qilish yuzasidan kelishuvlarga erishildi.

Shuningdek, o‘quv kurslari, qo‘shma loyihalar va ilmiy-tadqiqot faoliyatini amalga oshirish bo‘yicha fikr almashildi.

Uchrashuv yakunida O‘zbekiston Savdo-sanoat palatasi va “Skyline University College” universiteti o‘rtasida hamkorlik to‘g‘risida memorandum imzolandi. Ushbu kelishuv ikki mamlakat o‘rtasida taʼlim va tadbirkorlik sohalaridagi hamkorlikni yana-da rivojlantirishga xizmat qiladi.

SSP matbuot xizmati