Joriy yilning 20 fevral kuni Misrning Qohira shahrida “EGYPT FABRIC & YARN EXPO” mato va iplar xalqaro ko‘rgazmasi o‘z ishini boshladi.

“EGYPT FABRIC & YARN EXPO” — Shimoliy Afrika va Yaqin Sharq mintaqasida to‘qimachilik sanoati uchun muhim bo‘lgan xalqaro ko‘rgazma. Har yili Misrning Qohira shahrida o‘tkaziladigan ushbu tadbir mato, ip-kalava, to‘qimachilik jihozlari, bo‘yoqlar va yordamchi materiallar ishlab chiqaruvchilari hamda yetkazib beruvchilarini bir joyga jamlaydi.

O‘zbekiston Savdo-sanoat palatasi hamda “O‘zto‘qimachiliksanoat” uyushmasi tashabbusi bilan O‘zbekiston mahalliy to‘qimachilik korxonalari ushbu nufuzli tadbirda ishtirok etmoqda. Ular orasida “Zelal Tekstil”, “Shahrisabz Textile”, “Oqsaroy Textile”, “Quva Textile”, “Asaka Textile”, “WBM Romitex”, “Vobkent Tola Cluster” va boshqa yetakchi kompaniyalar bor.

20-23 fevral kunlari bo‘lib o‘tadigan bu yirik tadbir O‘zbekistonning to‘qimachilik sanoati salohiyatini namoyish etish, yangi hamkorlik aloqalarini yo‘lga qo‘yish va eksport imkoniyatlarini kengaytirish uchun muhim maydon hisoblanadi.

SSP matbuot xizmati