Joriy yilning 21 fevral kuni O‘zbekiston Savdo-sanoat palatasida "VTB Faktoring" vakillari bilan onlayn uchrashuvi bo‘lib o‘tdi.

Unda VTB Faktoring kompaniyasi Bosh direktor Igor Vnukov, O‘zbekiston Respublikasi Markaziy banki va Investitsiyalar, sanoat va savdo vazirligi vakillari ishtirok etdi.

Uchrashuvning asosiy maqsadi O‘zbekistonda faktoring xizmatlarini rivojlantirish sohasida hamkorlik istiqbollarini muhokama qilishdan iborat.

Suhbat chog‘ida innovatsion moliyaviy instrumentlarni joriy etish va faktoring sohasida tajriba almashish masalalariga alohida eʼtibor qaratildi. Shuningdek, tomonlar o‘rtasida quyidagicha masalalar muhokama qilindi:

- Zamonaviy faktoring yechimlarini integratsiya qilish – Faktoring jarayonlarini optimallashtirish uchun raqamli platformalar va onlayn xizmatlarni joriy etish;

- Kichik va o‘rta biznesni qo‘llab-quvvatlash – korxonalarning moliyaviy barqarorligini va likvidligini oshirish maqsadida faktoring xizmatlarini taqdim etish;

- Xalqaro hamkorlik – Chegaralar oralig‘i faktoringi va eksport-import operatsiyalarini moliyalashtirish istiqbollari;

Shuningdek, "VTB Faktoring" vakillari tomonidan boshqa davlatlarda amalga oshirilgan muvaffaqiyatli faktoring loyihalari haqida maʼlumotlar taqdim etildi. Shu bilan birga, qo‘shma dasturlarni ishlab chiqish bo‘yicha kelgusidagi hamkorlikni davom ettirish muhimligi qayd etildi.

Uchrashuv yakunida O‘zbekistonda faktoring xizmatlarini joriy etish bo‘yicha takliflarni batafsil ishlab chiqish hamda mazkur masala bo‘yicha ishchi guruh tashkil etishga kelishib olindi.

SSP matbuot xizmati