Joriy yil 16-yanvar kuni O‘zbekiston Savdo-sanoat palatasi raisi Davron Vaxabov va Misr Arab Respublikasining Favqulodda va Muxtor Elchisi Tamer Fathi Abdussalom Hammad o‘rtasida uchrashuv bo‘lib o‘tdi.

Muzokaralar davomida O‘zbekiston va Misr o‘rtasidagi savdo-iqtisodiy, sarmoyaviy va sanoat sohalarida o‘zaro hamkorlikni kengaytirishga qaratilgan dolzarb masalalar muhokama etildi.

Jumladan, tomonlar zargarlik, to‘qimachilik va asal ishlab chiqarish kabi sohalarda yangi loyihalarni amalga oshirish istiqbollari bo‘yicha fikrlar almashishdi. Hozirgi kunda O‘zbekistonda Misr kapitali ishtirokida 15 ta korxona faoliyat yuritmoqda.

Shuningdek, fevral oyining ikkinchi yarmida Misr ishbilarmon doiralari delegatsiyasining O‘zbekistonga tashrifi va uning doirasida O‘zbekiston-Misr biznes-forumi hamda V2V uchrashuvlarni tashkil etish bo‘yicha tegishli chora-tadbirlar belgilandi.

Uchrashuv yakunida tomonlar o‘zaro hamkorlikni chuqurlashtirish va tashrifga yuqori darajada tayyorgarlik ko‘rish yuzasidan kelishuvga erishildi.
——

Fevral oyida o‘tkaziladigan O‘zbekiston-Misr biznes-forumida Misrning savdo, kimyo, qurilish va qurilish materiallari, qishloq xo‘jaligi, sog‘liqni saqlash va farmatsevtika, konsalting, metallurgiya, logistika, elektrotexnika hamda charm sohalaridagi yetakchi korxonalar vakillarining ishtiroki ko‘zda tutilgan.

Tadbirda ishtirok etish istagida bo‘lgan tadbirkorlar qo‘yidagi telefon raqami orqali ro‘yxatdan o‘tishlari mumkin: +998913811067

SSP matbuot xizmati