O‘zbekiston Savdo-sanoat palatasi tomonidan yana bir tadbirkorning huquq va qonuniy manfaatlari himoya qilindi

O‘zbekiston Savdo-sanoat palatasiga uning aʼzosi “ARTATEX” MCHJ murojaat qilib, huquq va qonuniy manfaatlarini himoya qilishda amaliy yordam so‘ragan.

“ARTATEX” MCHJ murojaati o‘rganib chiqilganda, Shovot tumani Elektr taʼminoti korxonasi xodimi tomonidan ogohlantirishsiz 30 mln so‘m qarzdorlik mavjudligi vaji bilan korxonaning elektr energiyasi taʼminotidan uzib ketganini, natijada korxonada ishlab chiqarish hamda eksport to‘xtagani oqibatida korxona faoliyatida sezilarli darajada moddiy zarar ko‘rayotgani aniqlandi.

O‘zbekiston Respublikasi Prezidentining 2023 yil 10 yanvardagi PF-2-sonli Farmoni talablari hamda “Hududiy elektr tarmoqlari” AJ Xorazm hududiy filialining Shovot tumani Elektr taʼminoti korxonasi va “ARTATEX” MCHJ o‘rtasida tuzilgan shartnoma shartlaridan kelib chiqqan holda tadbirkorlik subyekti faoliyatiga bu tarzdagi to‘sqinliklarni bartaraf etish, huquq va qonuniy manfaatlarini bartaraf etish maqsadida Savdo-sanoat palatasi tomonidan “Hududiy elektr tarmoqlari” aksiyadorlik jamiyatiga qonunchilikda o‘rnatilgan tartibda murojaat qilindi.

“Hududiy elektr tarmoqlari” aksiyadorlik jamiyati tomonidan mazkur holat yuzasidan ichki xizmat tekshiruvi o‘tkazilib, Shovot tuman bo‘limi xodimi tomonidan “ARTATEX” MCHJda noqonuniy tarzda elektr energiyasi tarmog‘idan ajratish ishlarini amalga oshirilgani uchun Mehnat Kodeksining 312-moddasi 2-qismi bilan o‘rtacha oylik ish haqining 10 foizi miqdorda jarima intizomiy jazo chorasi qo‘llanilib, Palata aʼzosining huquq va qonuniy manfaatlari himoya qilindi.

SSP matbuot xizmati