O‘zbekiston biznesining korrupsiyaga qarshi kurashish Xartiyasining yangi aʼzolariga sertifikatlar topshirildi

Joriy yil 18 dekabr kuni Toshkentda “Tadbirkorlik faoliyati va uning ustidan davlat nazorati jarayonlarida korrupsiya xavfini kamaytirish” mavzusida xalqaro biznes-forum o‘tkazildi.

Unda turli sohalarda faoliyat ko‘rsatayotgan tadbirkorlik subyektlari, vazirlik va idoralar, OAV, jamoatchilik va xalqaro tashkilotlarning vakillari hamda xorijiy ekspertlar O‘zbekistonda biznes vakillari faoliyati uchun yaratilayotgan imkoniyatlar, sohadagi mavjud muammolarga oqilona yechimlar yuzasidan o‘zaro muloqot qilindi.

Tadbir davomida O‘zbekiston Savdo-sanoat palatasi raisining birinchi o‘rinbosari D.Kurbanov o‘z nutqi bilan ishtirok etib, korrupsiyaga qarshi kurashishda Palataning asosiy vazifalari haqida maʼlumotlar berib o‘tdi.

Yuqorida qayd etilgan masalalarda bildirilgan fikr-mulohazalar, tavsiyalar asosida xususiy sektorda korrupsiyaga qarshi kurashish tizimini yana-da takomillashtirishga doir amaliy takliflar ishlab chiqildi.

Forum kun tartibi davomida BMTning korrupsiyaga qarshi konvensiyasi talablari asosida Korrupsiyaga qarshi kurashish milliy kengash tomonidan tasdiqlangan korrupsiyaga qarshi xalqaro standartlarni milliy qonunchilikka implementatsiya qilishni davom ettirish bo‘yicha “Yo‘l xaritasi”ning ijrosi yuzasidan joriy etilgan “O‘zbekiston biznesining korrupsiyaga qarshi kurashish Xartiyasi”ga aʼzo bo‘lgan 19 nafar tadbirkorlik subyektlariga sertifikatlar topshirish marosimi bo‘lib o‘tdi.

Xartiya — tadbirkorlik subyektining moliyaviy faoliyatini boshqarish, shartnoma munosabatlari, kadrlarni tanlash va o‘qitish, ichki intizom va qonuniylikni mustahkamlash, davlat xaridlari kabi muhim yo‘nalishlarda korrupsiya xavf-xatarlarini oldini olishga qaratilgan kompleks choralarni o‘z ichiga olgan.

Xartiya normalarining amaliyotga joriy etilishi xususiy sektorda korrupsiyaning oldini olish, mamlakatning investitsiyaviy jozibadorligini oshirish, “halol” tadbirkorlarni rag‘batlantirish tizimini joriy etish imkonini beradi.

Bugungi kunga kelib, “O‘zbekiston biznesining korrupsiyaga qarshi kurashish Xartiyasi”ga jami 391 ta tadbirkorlik subyekti aʼzo bo‘ldi.

SSP matbuot xizmati