Joriy yil 18 dekabr kuni Toshkentda O‘zbekiston Savdo-sanoat palatasi, Iqtisodiyot va moliya vazirligi hamda “O‘zbekekspertiza” AJ sanoat sohasidagi korxonalar bilan hamkorlikda “Sanoat korxonalari uchun yangi istiqbollar va imkoniyatlar” mavzusida amaliy seminar o‘tkazildi.

Seminarda vazirliklar va idoralar, davlat xaridlari platformalari, iqtisodiyotning bazaviy ishlab chiqarish korxonalari, to‘qimachilik, charm, qurilish materiallari, elektrotexnika, zargarlik va boshqa yo‘nalishlardagi sanoat korxonalarining 300 dan ortiq vakillari qatnashdi.

Shuningdek, tadbirning amaliy ahamiyatini oshirish hamda respublikaning olis hududlaridagi ishlab chiqaruvchilarga qulaylik yaratish maqsadida 13 ta hududiy studiyalardan 200 dan ortiq sanoat korxonalari vakillari videokonferensaloqa orqali seminarda ishtirok etishdi.

Seminarda Vazirlar Mahkamasi tomonidan 2024 yil 28 oktyabrda qabul qilingan “Mahalliy ishlab chiqarilgan tovarlarni aniqlash tartibi to‘g‘risidagi Nizomni tasdiqlash haqida”gi 712-son qarorining mazmun-mohiyati, ushbu hujjatga asosan sanoat korxonalariga yaratilgan yangi istiqbollar va imkoniyatlar bilan tadbirkorlik subyektlari batafsil tanishtirildi.

Savdo-sanoat palatasi raisi D.Vaxabov seminarni kirish so‘zi bilan ochib berdi, shuningdek, Iqtisodiyot va moliya vazirligi, “Raqamli transformatsiya markazi” MCHJ, “O‘zbekiston Respublika tovar-xom ashyo birjasi” AJ, “Hayot birja” AJ hamda “O‘zbekekspertiza” AJning masʼul rahbarlari tomonidan mahalliy ishlab chiqarish jarayoni, sertifikatlashtirish va davlat xaridlarida tadbirkorlik subyektlarining ishtirokini kengaytirish imkoniyatlari to‘g‘risida maʼruza hamda taqdimotlar qilindi.

Kun tartibiga muvofiq, tadbirkorlik subyektlari mavzuga oid, o‘zlarini qiziqtirgan barcha savollarga mutasaddi vazirlik va idoralarning masʼul rahbarlaridan atroflicha javoblar olishdi hamda bugungi kundagi elektron xarid platformalari faoliyati to‘g‘risida o‘zaro fikr almashishdi.

SSP matbuot xizmati