Joriy yil 17 dekabrda Moskvada Rossiya Federatsiyasi savdo-sanoat palatasi raisligida MDHga aʼzo davlatlar Savdo-sanoat palatalari rahbarlari kengashining XXIII yig‘ilishi o‘tkazildi.

Kengashning asosiy maqsadi mamlakatlar o‘rtasida hamkorlikni rivojlantirishga ko‘maklashish, kichik va o‘rta biznesni qo‘llab-quvvatlash va rivojlantirish masalalari, MDHga aʼzo davlatlarda Savdo-sanoat palatalari rolini oshirish, ko‘rgazma-yarmarkalar faoliyatlarini faollashtirish, yagona axborot makonini yaratish, hududlararo va transchegaraviy hamkorlikni kengaytirish, davlat-xususiy sheriklik mexanizmlarini ishlab chiqish, biznes uchun kadrlar tayyorlash va boshqa shu kabi masalalar hisoblanadi.

Unda Armaniston, Belarus, Qozog‘iston, Qirg‘iziston, Tojikiston, Turkmaniston, O‘zbekiston Savdo-sanoat palatalari rahbarlari hamda Mo‘g‘uliston mehmon sifatida ishtirok etdi.

Yig‘ilishda Kengashning joriy yildagi faoliyati yakunlari, Savdo-sanoat palatalarining ishbilarmonlik manfaatlari yo‘lidagi faoliyatining eng muhim yo‘nalishlari hamda MDH mamlakatlaridagi korxona va tashkilotlar o‘rtasida aloqalarni yo‘lga qo‘yish yuzasidan fikr almashildi.

O‘zbekiston Savdo-sanoat palatasi raisi o‘rinbosari D.Rasulov o‘z nutqi davomida, kengash yig‘ilishida qatnashayotgan barcha mamlakatlar Savdo-sanoat palatalariga o‘tgan davr mobaynida o‘rnatilgan hamkorlik va o‘tkazilgan tadbirlar uchun alohida minnatdorlik bildirib o‘tdi. Shu bilan birga kun tartibidan o‘rin olgan masalalar yuzasidan maʼlumotlar berildi.

Tadbir yakunida MDHga aʼzo davlatlar Savdo-sanoat palatalari rahbarlari kengashi XXIII yig‘ilishining yakuniy qarori imzolandi.

2025 yilda MDHga raislik qilish va MDHga aʼzo davlatlar palatalari Kengashiga raislik qilish Tojikistonga o‘tdi.

SSP matbuot xizmati