Joriy yil 29 noyabr kuni AOKAda bo‘lib o‘tgan matbuot anjumanida Biznes-ombudsman o‘rinbosari Jamshid Urunov va Vakil devoni mutasaddilari Savdo-sanoat palatasi bilan hamkorlikda "Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida"gi Prezident Farmonining ahamiyati haqida batafsil maʼlumot berdi.

Farmonning maqsadi nima?

Ushbu farmon tadbirkorlik faoliyatiga noqonuniy aralashuvlarning oldini olish, tekshirishlarni tashkil etish tizimini takomillashtirish va mansabdor shaxslarning javobgarligini kuchaytirish orqali qulay biznes muhitini yaratishga qaratilgan.

Farmon bilan qanday o‘zgarishlar kiritilmoqda?

2025 yil 1 yanvardan:

Jismoniy shaxs tomonidan tadbirkorlik faoliyatini yakka tartibdagi tadbirkor sifatida davlat ro‘yxatidan o‘tmasdan amalga oshirganlik uchun moliyaviy jarima bekor qilinadi;

Fiskal belgilarni aks ettirish tartibini buzish, majburiy raqamli markirovkalash qoidalarini buzish va xodimlar sonini yashirish kabi huquqbuzarliklar uchun maʼmuriy javobgarlik bekor qilinadi.

2025 yil 1 martdan:

Sudda ish yuritish taraflar kelishuv bitimi tuzganligi sababli tugatilganda, tadbirkorlik subyektlari va fuqarolarga davlat bojining bir qismi qaytarib beriladi.

Nazorat qiluvchi organlar faoliyati qanday takomillashtiriladi?

Tadbirkorlik subyektlari faoliyatini nazorat qilishga vakolatli organlar va ularning nazorat sohalari ro‘yxati tasdiqlandi;

"Xavfni tahlil qilish" elektron tizimi joriy etiladi va tekshiruvlar xavf darajasiga qarab o‘tkaziladi;

Barcha tekshiruvlar "Yagona davlat nazorati" axborot tizimida ro‘yxatga olish orqali Biznes-ombudsmanni xabardor etish tartibida amalga oshiriladi.

Nazorat qiluvchi organlar xodimlarining malakasi qanday oshiriladi?

Tekshirish huquqini beruvchi maxsus guvohnomaga ega xodimlar har ikki yilda Biznes-ombudsman tomonidan tashkil etiladigan o‘quv kurslarida malakasini oshiradi.

Nazorat qiluvchi organlar faoliyati qanday baholanadi?

Biznes-ombudsman har yili nazorat qiluvchi organlar faoliyatini baholab, ularning reytingini eʼlon qilib boradi.

Biznes-ombudsman devonining faoliyati

Joriy yilning 10 oyi davomida Biznes-ombudsman devoniga tadbirkorlik subyektlaridan 15 509 ta murojaat kelib tushgan. Tadbirkorlarning huquqlarini himoya qilish borasida 2 117 ta taʼsir chorasi qo‘llanilgan. Natijada 16,1 mlrd so‘mlik daʼvo tadbirkorlar foydasiga hal etilgan.

Shuningdek, tadbirkorlik sohasidagi qonunchilik hujjatlarini takomillashtirish bo‘yicha 9 ta normativ-huquqiy hujjat loyihasi ishlab chiqilgan. 648 ta normativ-huquqiy hujjat loyihasi huquqiy ekspertizadan o‘tkazilib, ular bo‘yicha 617 ta taklif va eʼtirozlar yuborilgan.

Xulosa

Ushbu Farmonning qabul qilinishi tadbirkorlik muhitini yana-da yaxshilash, tadbirkorlar huquqlari va qonuniy manfaatlarini ishonchli himoya qilish, nazorat qiluvchi organlar faoliyatini takomillashtirish va ularning masʼuliyatini oshirishga xizmat qiladi.

SSP matbuot xizmati