O‘zbekiston Respublikasining Berlin shahridagi elchixonasida O‘zbekiston Savdo-sanoat palatasi raisi Davron Vaxabov Germaniyaning Katta ekspertlar xizmati (SES) ijrochi direktori Marion Zodemann bilan uchrashdi.

Katta ekspertlar xizmati (SES) nafaqaxo‘r yoki ishdan bo‘sh vaqtlarida ishlaydigan mutaxassislar va rahbarlar uchun Germaniyaning yetakchi ko‘ngillilar tashkiloti. 1983 yilda tashkil topgan mazkur jamg‘armada 11 000 dan ortiq ekspertlar faoliyat yuritadi. Ushbu mutaxassislar tomonidan shu kungacha dunyoning 160 mamlakatida 25 mingdan ziyod loyiha amalga oshirilgan. Ular o‘z faoliyati bilan bog‘liq hech qanday xarajatlarni o‘z zimmalariga olmaydilar, barcha loyihalar moliyalashtiriladi. 2024-yil uchun 6 mln yevro ajratilib, 800 nafardan ortiq ekcpertlar dunyoning turli mamlakatlariga yuborildi.

Tomonlar professional taʼlim, mutaxassislar malakasini oshirish sohalarda Germaniya bilan tajriba almashinuvini yo‘lga qo‘yish, bu yo‘nalishlarda muayyan loyihalarni amalga oshirish masalalarini muhokama qildi.

Dastlab 2025 yil davomida O‘zbekistonga 35 nafar nemis mutaxassisini yuborish rejalashtirilgan edi, ammo o‘zbek tomoni mazkur kvotani 250 nafargacha oshirish taklifini kiritdi. Nemis mutaxassislarining tashrifi 2 haftadan 6 haftagacha davom etishi rejalashtirilgan.

Uchrashuv davomida hamkorlik doirasida o‘zaro tajriba almashish masalalariga alohida eʼtibor qaratildi. Bunday hamkorlik o‘zbek korxonalarining raqobatbardoshligini oshirishga va xalqaro sifat standartlarini joriy etishga xizmat qiladi. Shuningdek, sanoat sohasini modernizatsiya qilish va O‘zbekiston hamda Germaniya o‘rtasidagi ikki tomonlama iqtisodiy aloqalarni mustahkamlashda SES-ekspertlarining o‘rni muhim ahamiyatni kasb etishi taʼkidlandi.

Suhbat yakunida tomonlar 2025 yilda hamkorlik aloqalarini yana-da rivojlantirish va qo‘shma loyihalarni amalga oshirishga kelishib oldilar.

SSP matbuot xizmati