Avval xabar berganimizdek, ayni kunlarda O‘zbekiston delegatsiyasi Savdo-sanoat palatasi raisi Davron Vaxabov boshchiligida Germaniya Federativ Respublikasida ishchi tashrif bilan bo‘lib turibdi.

Tashrif doirasida O‘zbekiston Respublikasining Berlin shahridagi elchixonasida O‘zbekiston Savdo-sanoat palatasi (SSP) raisi Davron Vaxabov va Saksoniya iqtisodiyoti taʼlim markazi (BSW) ijrochi direktori Ralf Hyubner o‘rtasida uchrashuv bo‘lib o‘tdi.

Unda O‘zbekiston Respublikasi Prezidenti maslahatchisining o‘rinbosari Alisher Samadov va O‘zbekistonning Germaniyadagi favqulodda va muxtor elchisi Dilshod Ahatov ham ishtirok etdilar.

Uchrashuvda SSP va BSW o‘rtasidagi “SSP institutsional rivojlanishi” loyihasi doirasidagi keyingi qadamlarni muhokama qilindi. Ushbu loyiha byudjeti 1 mln AQSH dollarini tashkil etib, Palata salohiyatini mustahkamlash va O‘zbekistonda tadbirkorlikni qo‘llab-quvvatlashga qaratilgan.

Shuningdek, grant asosida O‘zbekistonda Germaniya modeli asosidagi kasb-hunar taʼlimi tizimini joriy etish orqali O‘zbekiston Savdo-sanoat palatasi va uning hududiy bo‘limlarini yetakchi xizmat ko‘rsatuvchi va tadbirkorlik manfaatlari vakillari sifatida mustahkamlash va rivojlantirishga qaratilgan loyihani ishga tushirish masalasi ko‘rib chiqildi. Mazkur loyiha Savdo-sanoat palatasi xodimlarining malakasini oshirish va O‘zbekiston iqtisodiyoti talablariga moslashtirilgan barqaror kasbiy taʼlim tizimini yaratishni nazarda tutadi.

Shuningdek, “Ausbildung” nemis dual taʼlim tizimi asosida taʼlim markazini ochish masalasiga alohida eʼtibor qaratildi. Ushbu kasbiy taʼlim muddati tanlangan mutaxassislikka qarab 1 yildan 3,5 yilgacha davom etadi.

“Ausbildung” tizimini O‘zbekistonda joriy etish zamonaviy mehnat bozori talablariga javob beradigan malakali mutaxassislarni tayyorlash imkonini beradi hamda O‘zbekiston va Germaniya o‘rtasidagi iqtisodiy aloqalarni mustahkamlashga xizmat qiladi.

SSP matbuot xizmati