Bugun O‘zbekiston Savdo-sanoat palatasi raisi o‘rinbosari Dilshod Rasulov hamda Britaniya xalqaro treyderlar gildiyasi (Worshipful Company of World Traders) raisi Maykl Larsen o‘rtasida uchrashuv bo‘lib o‘tdi.

1985 yilda tashkil etilgan Worshipful Company of World Traders London shahrida joylashgan 111 gildiyadan biri sanaladi. Gildiya moliyaviy xizmatlar va savdoning barcha sohalarida xalqaro treyderlar, jumladan brokerlar, bankirlar, auditorlar va maslahatchilar, shuningdek, tovarlar va xizmatlar savdogarlari assotsiatsiyasidir.

Suhbat chog‘ida Maykl Larsen O‘zbekistonda amalga oshirilayotgan keng ko‘lamli va samarador islohotlarni yuksak baholadi.

Uchrashuvda tomonlar o‘rtasida treyding sohasidagi ikki tomonlama hamkorlik bo‘yicha muhokamalar olib borilib, savdo-iqtisodiy munosabatlarning rivojlanishiga qaratilgan takliflar ko‘rib chiqildi.

Shuningdek, O‘zbekiston Savdo-sanoat palatasi hamda Britaniya Xalqaro treyderlar gildiyasi bilan hamkorlikda Buyuk Britaniya davlati treyderlaridan tashkil topgan delegatsiyaning O‘zbekistonga tashrifini tashkil etishga kelishib olindi.

SSP matbuot xizmati