O‘zbekiston Savdo-sanoat palatasi raisi Davron Vaxabovning Turkiyaga tashrifi doirasida Turkiya savdo palatalari va tovar birjalari ittifoqi raisi Rifat Hisarchiqlo‘g‘li bilan uchrashuv tashkil etildi.

Uchrashuvda tomonlar O‘zbekiston va Turkiya o‘rtasidagi savdo-iqtisodiy hamkorlikni rivojlantirishga doir qator muhim masalalarni atroflicha muhokama qildilar, shuningdek, O‘zbekiston Savdo-sanoat palatasining Xalqaro savdo palatasi va Islom savdo va rivojlantirish palatasi faoliyatidagi faol ishtirokining ahamiyatiga alohida to‘xtalib o‘tildi.

Asosiy eʼtibor ishbilarmonlik aloqalarini mustahkamlash va sarmoya kiritish darajasini oshirishga qaratilgan o‘zaro biznes missiyalar va qo‘shma tadbirlarni tashkil etishga qaratildi.

Bundan tashqari, Turkiyada O‘zbekiston Savdo-sanoat palatasining birinchi vakolatxonasi ochilishi ham mamlakat eksport salohiyatini kengaytirish nuqtai nazaridan muhim ahamiyatga ega bo‘lishi asosiy mavzulardan biri bo‘ldi.

Konstruktiv muzokaralar natijasida Turkiya savdo palatalari va tovar birjalari ittifoqi binosida O‘zbekiston Savdo-sanoat palatasining vakolatxonasini ochish bo‘yicha kelishuvga erishildi.

SSP matbuot xizmati