Joriy yil 27 sentyabr kuni “O‘zbekiston asalarichilari” uyushmasi aʼzolarining navbatdan tashqari yig‘ilishi o‘tkazildi.

Unda O‘zbekiston Savdo-sanoat palatasi vakillari, Uyushma aʼzolari, shuningdek sohaning ilg‘or tadbirkorlari ishtirok etdi.

Yig‘ilish davomida asalarichilik xo‘jaliklari faoliyati samaradorligini oshirish, sohaning eksport salohiyatini oshirish, shuningdek, asalarichilik sohasidagi ilg‘or tajribalarni respublikamizning barcha hududlarida tatbiq etish maqsadida, ”O‘zbekiston asalarichilari” uyushmasi boshqarish tizimini tubdan takomillashtirish masalalari ko‘rib chiqildi.

Dastavval Prezidentining 2024 yil 14 martdagi PQ-126-sonli qaror ijrosini o‘z vaqtida va sifatli taʼminlash hamda Uyushmaning kelgusi faoliyatiga ko‘maklashish maqsadida Uyushma Rayosatini tashkil etish taklifi kiritildi.

Uyushma Rayosati Savdo-sanoat palatasi, tegishli vazirlik va idoralar hamda tijorat banklari vakillari, shuningdek asalarichilik sohasida boy tajriba va malakaga ega 25 nafar aʼzo bilan tashkil etilishi belgilandi.

Uyushma Rayosatining asosiy vazifalari asalarichilik korxonalari tomonidan bildirilgan taklif va tashabbuslarni yuqori tashkilotlarga chiqish, davlat organlari va sohadagi tadbirkorlar o‘rtasida samarali hamkorlikni o‘rnatish hamda asalarichilik faoliyatini tartibga soluvchi normativ-huquqiy hujjatlar loyihalarini muhokama qilishdan iborat.

Shuningdek, kun tartibida Uyushmaning tashkiliy tuzilmasiga o‘zgartirishlar kiritilib, Uyushma raisi va uning 2 nafar o‘rinbosari vazifalarini vaqtincha bajaruvchilar saylandi.

SSP matbuot xizmati