Joriy yil 18 sentyabr kuni O‘zbekiston Savdo-sanoat palatasi raisi Davron Vaxabov va “O‘zbekiston-Fransiya” iqtisodiy palatasi prezidenti Joanna Golas o‘rtasida uchrashuv bo‘lib o‘tdi.

Joriy yil aprel oyida mamlakatimizda “O‘zbekiston-Fransiya” iqtisodiy palatasi ochildi. Bu tashabbus Fransiya Respublikasi Prezidenti Emmanuel Makronning 2023 yil noyabr oyida O‘zbekistonga tashrifi chog‘ida davlat rahbarlari tomonidan bildirilgan edi. “O‘zbekiston-Fransiya” iqtisodiy palatasi 50 dan ortiq fransuz kompaniyasi va tadbirkorlarini hamda ularning o‘zbekistonlik hamkorlarini birlashtiradi.

Uchrashuvdan maqsad O‘zbekiston va Fransiya o‘rtasidagi savdo-iqtisodiy munosabatlarni rivojlantirish, o‘zaro manfaatli hamkorlikni yana-da kengaytirish hamda tovar ayirboshlash hajmini oshirishdan iborat.

Uchrashuv davomida ishbilarmon doiralar va davlat organlari vakillarini jalb qilgan holda davra suhbatlarini o‘tkazish, O‘zbekiston va Fransiya kompaniyalarining mahsulot va xizmatlarini ilgari surish, shu jumladan qo‘shma korxonalar tashkil etish masalalari muhokama qilindi.

Muloqot doirasida O‘zbekiston Savdo-sanoat palatasi raisi Davron Vaxabov va “O‘zbekiston-Fransiya” iqtisodiy palatasi prezidenti Joanna Golas hamkorlik to‘g‘risidagi memorandumni imzoladilar. Hujjatda ustuvor yo‘nalishlar doirasida munosabatlarni yana-da rivojlantirishning aniq mexanizmi belgilangan.

SSP matbuot xizmati