Joriy yil 17 sentyabr kuni O‘zbekiston Savdo-sanoat palatasida Eron Islom Respublikasining O‘zbekiston Respublikasidagi elchixonasi ko‘magida Eronning elektr motorlar ishlab chiqaradigan “Pars Motor” va suv nasos ishlab chiqaruvchi “Best Thermo Solutions” korxonalari muhandislari bilan uchrashuv bo‘lib o‘tdi.

“Pars Motor" maishiy va sanoat maqsadlari uchun 50 dan ortiq elektr motorlarini yetkazib beruvchi korxona hisoblanadi. 165000 kvadrat metr ishlab chiqarish maydoni va 1500 dan ortiq malakali xodimlardan iborat korxona o‘z mijozlariga yuqori sifatli xizmat ko‘rsatish uchun resurslarga ega.

"Best Thermo Solutions" kompaniyasi isitish uskunalari bozorida 2008 yildan beri faoliyat yuritib kelmoqda, Eron va O‘zbekiston o‘rtasidagi savdo aloqalarini rivojlantirishda yetakchi o‘rinni egallaydi. Yangi texnik bilimlar va uskunalar segmentida malakali mutahassislarga ega bo‘lganligi tufayli u xalqaro standartlar va arzon narxlarda tovarlar va xizmatlarni taqdim etadi.

Uchrashuv natijalariga ko‘ra, muhandislarning Namangan viloyatiga tashrifini amalga oshirish va hududda joylashgan korxona muhandislari uchun o‘quv seminarlarini tashkil etish masalalari bo‘yicha kelishuvga erishildi.

SSP matbuot xizmati