Iroq Respublikasi diplomatik vakillarining Oʼzbekistonga tashrifi davomida Oʼzbekiston Savdo-sanoat palatasi raisi oʼrinbosari U.Safarov va Iroqning Ostonadagi muvvaqat ishlari boʼyicha vakili Jobir al-Tamimiy oʼrtasida ikki tomonlama muzokaralar boʼlib oʼtdi.

Uchrashuvda taʼkidlanganidek, Oʼzbekistonning Iroq bilan savdo aylanmasi 2022-yilda 12,1 mln AQSh dollarini tashkil qilgan va bu raqam 2023-yilda 22,1 mln AQSh dollariga oshgan va ushbu koʼrsatkichlar savdo-iqtisodiy aloqalar yanada rivojlanayotganligini namoyon qilmoqda.

Muloqot davomida ikki davlat Savdo-sanoat palatalari oʼrtasida hamkorlik aloqalarini yanada rivojlantirish va mustahkamlash maqsadida hamkorlik memorandumini imzolash taklifi bildirildi. Oʼzbekiston va Iroq ishbilarmon doiralari ishtirokida qoʼshma tadbirlar, biznes forumlar va B2B formatidagi uchrashuvlar tashkil qilinishi haqida kelishib olindi.

Xususan, Oʼzbekiston va Iroq vakillari tomonidan savdo-iqtisodiy va logistika masalalari muhokama qilinib, Oʼzbekistonda ishlab chiqarilgan mahsulotlarga Iroq bozorida talab yuqori ekanligini inobatga olgan holda, toʼqimachilik, oziq-ovqat va qishloq xoʼjaligi mahsulotlari xaridini yoʼlga qoʼyish taklifi ilgari surildi.

SSP matbuot xizmati