Eksport faoliyati bilan shug'ullanayotgan tadbirkorlik subyektlarini qo'llab-quvvatlash, mahalliy eksportchilar mahsulotlarini jahon bozorlariga olib chiqish maqsadida Savdo-sanoat palatasi tashabbusi bilan joriy yilning 25-aprel kuni Toshkentda O'zbekiston-Afg'oniston biznes-forumi tashkil etildi.

Unda O‘zbekiston Savdo-sanoat palatasi raisi o‘rinbosari Dilshod Rasulov, Afg‘oniston Savdo-sanoat palatasi raisi o‘rinbosari Al-Xadj Hayrudin, tegishli vazirlik va idoralar, tarmoq birlashmalari rahbarlari, shuningdek 200 ga yaqin ikki davlat ishbilarmon doiralari vakillari ishtirok etdi.

O‘zbekiston va Afg‘oniston o‘rtasidagi sarmoyaviy va savdo-iqtisodiy hamkorlikni yanada rivojlantirishning hal qiluvchi omili sifatida har ikki mamlakat ishbilarmon doiralari o‘rtasidagi ikki tomonlama aloqalarni mustahkamlash masalalari tadbirning asosiy mavzusi bo‘ldi.

Forum doirasida mehmonlarga O‘zbekistonda biznes yuritish uchun yaratilayotgan imkoniyat va qulayliklar, mamlakatimizdagi erkin iqtisodiy zonalar, soliq va bojxona imtiyozlari haqida so‘zlab berildi.

Tadbirda tomonlar so‘nggi yillarda O‘zbekiston va Afg‘oniston o‘rtasidagi aloqalar rivojlanib borayotgani, turli yo‘nalishlardagi hamkorlik munosabatlari, yaqin qo‘shnichilik va do‘stlik aloqalari mustahkamlanayotganini qayd ettilar.

2023-yil yakuni bo'yicha Afg‘oniston bilan o‘zaro savdo hajmi 866,9 million dollarni tashkil etgan. O‘zbekiston eksporti 856,6 million dollardan, import esa 10,3 million dollardan oshgan. Afg‘oniston mamlakatimizning asosiy o‘nta savdo hamkorlari qatoriga kiradi.

Forum arafasida 24-aprel kuni O‘zbekiston tovar ishlab chiqaruvchilari ko‘rgazmasi tashkil etildi. Ko‘rgazmada mamlakatimizning 120 dan ortiq elektrotexnika, to‘qimachilik, qishloq xo‘jaligi, oziq-ovqat sanoati, charm-poyabzal sanoati kabi sohalardagi tovar ishlab chiqaruvchilari, shuningdek, O‘zbekiston hunarmandlarining mahsulotlari ham namoyish etildi.

Qo'shnimiz Afg‘oniston katta isteʼmol bozoriga ega. 2024-yil holatiga ko'ra, Afg'oniston aholisi 34,9 million kishini tashkil etadi. O‘zbekiston mahsulotlari qo'shni mamlakat uchun qolgan mamlakatlar importiga qaraganda ancha arzonroq. Shunday ustunliklarga ega bo'lgan holda, ushbu ko'rgazma tadbirkorlarimiz uchun bu bozorni egallash hamda istiqbolli hamkorlik loyihalarini amalga oshirish imkoniyatini kengaytiradi.

Shu bilan bir qatorda Forum doirasida B2B formatida hamkorlik uchrashuvlar tashkil etilib, koʻplab oʻzaro manfaatli shartnoma va kelishuvlarga erishildi.

Yurtimizning eng faol tadbirkorlari va talabgor davlat importyorlarini bir iqtisodiy maydonda jamlovchi mazkur tadbirlar O‘zbekiston eksport salohiyatini bir necha barobar oshirishi kutilmoqda.

SSP matbuot xizmati