Afg‘oniston Savdo-sanoat palatasi raisi o‘rinbosari boshchiligidagi Afg‘oniston ishbilarmon doiralari delegatsiyasining tashrifi chog‘ida O‘zbekiston tovar ishlab chiqaruvchilari ko‘rgazmasi tashkil etildi.

Ma’lumki, bu ikki qo‘shni davlat bozori bir-biri uchun istiqbolli hisoblanadi. Shu bois o‘zaro iqtisodiy, savdo aloqalari ko‘lamini yanada kengaytirish masalasiga alohida e’tibor qaratilmoqda.

O‘zbekiston Savdo-sanoat palatasi raisi Davron Vaxabov mamlakatimizda ishlab chiqarilgan mahsulotlarni taqdim etdi.

Ko‘rgazmada mamlakatimizning 120 dan ortiq elektrotexnika, to‘qimachilik, qishloq xo‘jaligi, oziq-ovqat sanoati, charm-poyabzal sanoati kabi sohalardagi tovar ishlab chiqaruvchilari, shuningdek, O‘zbekiston hunarmandlarining mahsulotlari ham namoyish etildi.

2023-yil yakuni bo'yicha Afg‘oniston bilan o‘zaro savdo hajmi 866,9 million dollarni tashkil etgan. O‘zbekiston eksporti 856,6 million dollardan, import esa 10,3 million dollardan oshgan. Afg‘oniston mamlakatimizning asosiy o‘nta savdo hamkorlari qatoriga kiradi.

Qo'shnimiz Afg‘oniston katta isteʼmol bozoriga ega. 2024-yil holatiga ko'ra, Afg'oniston aholisi 34,9 million kishini tashkil etadi. O‘zbekiston mahsulotlari qo'shni mamlakat uchun qolgan mamlakatlar importiga qaraganda ancha arzonroq. Shunday ustunliklarga ega bo'lgan holda, ushbu ko'rgazma tadbirkorlarimiz uchun bu bozorni egallash hamda istiqbolli hamkorlik loyihalarini amalga oshirish imkoniyatini kengaytiradi.

SSP matbuot xizmati