O‘zbekiston Savdo-sanoat palatasi raisi o‘rinbosari Dilshod Rasulov hamda Germaniya Federativ Respublikasi Shtaynbax-Xallenberg shahri meri Markus Byottxer boshchiligidagi ishbilarmon doira vakillaridan iborat delegatsiya ishtirokida uchrashuv bo‘lib o‘tdi.

Uchrashuv O‘zbekiston Savdo-sanoat palatasi qoshida tashkil etilgan Germaniya-O‘zbekiston biznes hamkorligi byurosi DUWK Büro bilan hamkorlikda tashkil etildi.

Unda Germaniyaning taʼlim, mashinasozlik, konchilik hamda sanoat sohalarida faoliyat yurituvchi "Astaxa GmbH", "Hehnke GmbH & CoKG", "Sofidel Germany GmbH" va "Simson Private Akademie gGmbH" yetakchi kompaniyalar vakillari ishtirok etdi.

Hozirgi vaqtda O‘zbekistonda Germaniya sarmoyasi ishtirokidagi 221 korxona, jumladan, 107 ta qo‘shma korxona va 114 ta 100 foiz Germaniya kapitali ishtirokidagi korxona faoliyat ko‘rsatmoqda.

Suhbat chog‘ida Dilshod Rasulov tomonidan O‘zbekiston Savdo-sanoat palatasining faoliyati va vazifalari, shuningdek, mamlakatimizda tadbirkorlar va investorlar uchun ishbilarmonlik muhitini takomillashtirish yo‘lida amalga oshirilayotgan islohotlar haqida maʼlumot berildi.

O‘z o‘rnida Germaniya davlati tadbirkorlaridan iborat delegatsiya vakillari o‘zaro hamkorlikdan manfaatdorligini bildirdilar. Shuningdek, uchrashuv davomida tomonlar hamkorlikning keng ko‘lamli dolzarb masalalari, jumladan, investitsiyalar kiritish va qo‘shma loyihalarni amalga oshirish bo‘yicha konstruktiv fikr almashishdi.

Uchrashuv yakunlari bo‘yicha tomonlar o‘zaro munosabatlarning barcha muhokama qilingan yo‘nalishlari bo‘yicha hamkorlikni yana-da chuqurlashtirish va kengaytirishga kelishib oldilar.

SSP matbuot xizmati