04.05.2020 672

Rossiyaga eksport qilish imkoniyati yuqori bo‘lgan olma mahsuloti bo‘yicha tahlil


Jahon bozorida yuzaga kelgan holat shuni ko‘rsatmoqdaki, Rossiyada olmaning o‘rtacha narxi 10% ga oshdi. Bugungi kunda, mahalliy yetishtiruvchilar tomonidan yetishtirilgan olmaning narxi uning hajmi va turiga qarab 1 kg uchun 0,75 dollardan 1,09 dollargacha sotilmoqda.

Butun dunyoda pandemiya bilan bog‘liq murakkab vaziyat yuzaga kelganligi, eksport qiluvchi mamlakatlarda olma zahiralarining kamayishi hamda olmani Rossiya bozoriga yetkazib berishda uzilishlar tufayli, import qilinadigan olma narxi ham nisbatan oshganini ko‘rish mumkin.

2019 yilda Rossiya jami 586 mln.dollar miqdorida yoki 934,5 ming tonna xorijiy davlatlardan olma import qilgan. Moldova asosiy olma eksport qiluvchi davlat sifatida Rossiyaga 250,2 ming tonna miqdorida olma yetkazib bergan va Rossiyaning jami olma importning 26,8 % ni tashkil qilgan.

Shu bilan birga, Serbiya (17,6% yoki 164,4 ming tonna), Argentina (10,8% yoki 101,1 ming tonna), Ozarbayjon (9,7% yoki 91 ming tonna), Belarus (8,6% yoki  80,6 ming tonna), Janubiy Afrika (5,4% yoki 50,2 ming tonna) va boshqa davlatlar tomonidan ham Rossiyaga olma eksport qilingan.

Respublikamizdan 2019 yilda Rossiyaga umumiy qiymati 4,3 mln.dollar miqdorida (0,4%)1,9 ming tonna olma eksport qilingan.

BMTning Oziq-ovqat va qishloq xo‘jaligi tashkiloti (FAO) ma'lumotlariga ko‘ra, koronavirus pandemiyasining tarqalishi, iste'molchilar daromadining pasayishi va ta'minot zanjirida uzilish kuzatilganligi sababli  jahonda olma savdosi 1-1,2 mlrd.dollarga tushib ketishi mumkin.

Shuningdek, olma savdosining hajmi keskin tushib ketishi oqibatida Pol'sha, Moldova, Serbiya, Xitoy, Turkiya, Eron va Ukraini kabi yirik olma eksport qiluvchi davlatlar zarar ko‘rishi mumkin.

Rossiyaning yirik bog‘dorchilik xo‘jaliklarida olma zahiralari kamayib bormoqda, bu esa o‘z navbatida yurtimizdan Rossiyaga olma eksportini yanada oshirish imkoniyatini berishi mumkin.

O‘zSSP Axborot xizmati