05.11.2018 1986

Tadbirkorlik sub'ektlari O'zbekiston Savdo-sanoat palatasining  ishonchli himoyasida


O'zbekiston Respublikasi Savdo-sanoat palatasi va uning hududiy boshqarmalari Palata to'g'risidagi Qonun bilan berilgan vakolatlardan samarali foydalanib, tadbirkorlarning huquqlari va qonuniy manfaatlarini himoya qilish borasida keng qamrovli tashkiliy va amaliy ishlarni olib borishmoqda. Bunday say'i harakatlar samarasini yaqin kunlarda tadbirkorga ko'rsatilgan amaliy yordam misolida ko'rishimiz mumkin:

Toshkent viloyati Yangiyo'l tumanida faoliyat yuritayotgan “ASR SAHOVAT FAYZ ” fermer xo'jaligi 16.04.2016 yilda Yangiyo'l tumani gaz tashkiloti bilan tuzilgan shartnomaga asosan tabiiy gaz xarid qilib g'isht ishlab chiqarish faoliyatini olib borgan. 30.05.2018 yilda Toshkent viloyati Yangiyo'l tumani MIB xodimlari J.Aslanov va A.Maxmudovlar Yangiyo'l tuman gazta'minot tashkiloti mutahassislari ishtirokida xo'jalikda tezkor tekshirish natijasida “ASR SAHOVAT FAYZ” FX tasarrufidagi gaz xisoblagichning “Texnik shart”da ko'rsatilgan maksimal soatlik gaz sarfiga mos kelmasligi holati aniqlangan va №MIB TV GH-0001690-sonli dalolatnoma tuzilgan hamda ushbu asosida FXdan 2016-2018 yillar mobaynida  foydalanilgan gaz hajmi uchun  809.8 mln.so'm qo'shimcha to'lov hisoblangan.

“ASR SAHOVAT FAYZ” FX rahbari R.Valievning MIB mansabdor shaxslari hatti-xarakatlari ustidan yozgan arizasi Toshkent viloyati Yangiyo'l tuman ma'muriy sudida ko'rib chiqilib, sudning 28.06.2018 yildagi ajrimi bilan R.Valievning dastlabki himoya chorasini qo'llash haqidagi talabi qanoatlantirilgan va MIB Yangiyo'l tuman bo'limi mansabdor shaxslarining Fermer xo'jaligidan qarzdorlikni undirishga qaratilgan hatti-xarakatlari mazkur ma'muriy ish mazmunan ko'rilgunga qadar to'xtatilgan.

Shuningdek, mazkur sudning 16.07.2018 yildagi xal qiluv qarori bilan Toshkent viloyati MIB Yangiyo'l tumani bo'limi mansabdor shaxslarining 30.05.2018 yilda TVGH-0001690-sonli dalolatnomani tuzganlikda ifodalangan hatti-xarakatlari g'ayriqonuniy deb topilgan.

Toshkent viloyati Yangiyo'l tuman ma'muriy sudining 16.07.2018 yildagi qaroriga nisbatan Yangiyo'l tuman prokuraturasi tomonidan apellyatsiya tartibida protest kiritilgan bo'lib, ish hujjatlari 27.09.2018 yil kuni apellyatsiya tartibida Toshkent viloyati ma'muriy sudida ko'rib chiqilgan. Mazkur protsessda tomonlar bilan bir qatorda “ASR SAHOVAT FAYZ” FX rahbari R.Valievning jamoatchilik himoyachisi sifatida Savdo-sanoat palatasi ishonchli vakili B.Ibadullaev ham qatnashgan va sud jarayonida ko'rilayotgan masala yuzasidan o'z fikr-mulohazalarini bildirgan hamda tadbirkorga huquqiy yordam berib kelgan. 

Sud jarayonida ishdagi har bir holat yana bir bor sinchkovlik bilan o'rganib chiqilib, shuningdek Palata mas'ul xodimi B.Ibadullaevning fikrlari hisobga olingan holda “ASR SAHOVAT FAYZ” FX rahbari R.Valiev foydasiga qaror chiqarilgan hamda Yangiyo'l tuman ma'muriy sudning 16.07.2018 yildagi xal qiluv qarori o'zgarishsiz qoldirilgan va keltirilgan apellyatsiya protestni qanoatlantirish rad etilgan. 

Mazkur holatda Palata xodimining bevosita faol ishtiroki natijasida ishlab chiqarish bilan shug'ullanayotgan yana bir tadbirkorning faoliyati tiklandi va uning rahbarligi ostidagi o'nlab fuqarolar o'z ishchi joylarini saqlab qoldilar. 
 

 

O'z SSP Axborot hizmati  t.me/uzchamber